औद्योगिक वसाहतीत माऊली स्टीलमध्ये सुरवातीला तीन हजार टन इंगट तयार केले जात होते. विशेष म्हणजे स्टील उद्योगाचा कुठलाही अनुभव नसताना केवळ इच्छाशक्ती व मेहनतीच्‍या जोरावर स्टील उद्योगात उतरून शिकत, सावरत वाटचाल सुरू केली. इंगटच्या पुढची पायरी म्हणून पिळदार सळई निर्माण करण्याचा विचार या नऊ जणांनी केली. ही पिळदार सळई तयार करणारी बंद पडलेली एक मिल वर्ष १९९९ मध्ये चालविण्यासाठी भाडेतत्त्वावर घेतली. त्यानंतर ही मिल खरेदी करण्याचा प्रस्ताव बॅंकेकडे ठेवला आणि वर्ष २००३ मध्ये एक रोलिंग मिल विकत घेऊन पिळदार सळई निर्माण करण्यास सुरवात झाली. हा व्यवसाय पुढे जात असताना २००४ मध्ये स्टील उद्योगावर असलेल्या एका चर्चासत्रात सहभागी झाल्यानंतर जर्मनी येथे टीएमटी बार सळई वापरली जात आहे. ही सळई गंजरोधक, अधिक मजबुती, अधिक गुणवत्ता देणारी आहे. त्यामुळे जर्मनीची उपकंपनी असलेल्या एच. अॅण्ड के. स्टील कंपनीशी संपर्क साधला. त्यानंतर महाराष्ट्रात टीएमटी स्टील निर्मितीचा पहिला प्रकल्प जालना येथे सुरू केला.

सुरवातीला टीएमटी स्टील हे बाहेरून कडक व आतून नरम असल्याचे अनेकांकडून सांगण्यात आले, त्यामुळे पुणे येथे इंजिनिअर, प्राध्यापक, बांधकाम व्यावसायिकांची बैठक घेऊन टीएमटी स्टील संदर्भातील चर्चासत्र आयोजन केले. या चर्चासत्रानंतर पुणे व परिसरातून टीएमटी स्‍टीलची मागणी वाढली. त्यानंतर २००५ मध्ये इंगटपेक्षा बिलेटची मागणी अधिक असल्याने ते निर्माण करण्यात सुरुवात केली. त्या वेळी ती भारतातील सर्वांत मोठी कंपनी होती. देशामध्ये वर्ष २००८-०९ नंतर २५ मजल्‍यांच्‍या इमारती बांधण्यासाठी परवाने मिळाली. त्यामुळे शुद्ध स्टीलची गरज असल्याने लॅडर रिफायनरी करण्यास सुरू केले. त्यानंतर स्टील रिफायनर करून स्टील निर्मितीस सुरवात केली. परिणामी स्टीलची गुणवत्ते वाढ झाली. त्यामुळे २५, ५० मजल्‍यांच्‍या इमारतीसाठी सदरील स्‍टील गुणवत्तापूर्ण व दर्जेदार असल्‍याने मोठी मागणी वाढली. तेव्हाची माऊली स्टील ते आजची मेटारोल स्टील निर्मितीचा प्रवास थक्क करणारा असून मेटारोलमध्ये सर्व प्रकारच्या सळया आज आपल्‍या देशातील जवळपास सर्वच राज्यांत तसेच इतर देशांमध्येही जात आहेत.

वर्ष २००२ मध्ये गुजरात राज्यातील कच्‍छ येथे भूकंप झाला होता. हा भूकंप एवढा तीव्र होता की, या ठिकाणी असलेल्‍या आरसीसी इमारतीही कोसळल्‍या होत्‍या. यानंतर तज्‍ज्ञांकडून याची समीक्षा केली असता असे दिसून आले होते की, कमकुवत स्‍टील वापरल्‍यामुळे या इमारती जमीनदोस्त झाल्‍या होत्‍या. तेथे शासनकर्त्यांनी त्‍यास पर्याय म्‍हणून FE ५०० ग्रेड असणारेच स्‍टील इथून पुढे बांधकामासाठी वापरण्यात यावे, असे स्‍पष्ट निर्देश दिले होते. त्‍यानुसार गुजरात राज्‍यात देशातील तीन ते चार FE ५०० स्‍टील उत्‍पादन करणाऱ्या कंपन्‍यांकडून स्‍टील मागणी करण्यात आली होती. त्‍यावेळी मेटारोलचे स्‍टील खूप मोठ्या प्रमाणात वापरण्यात आले. त्‍यानंतर या ठिकाणी कंपनीच्‍या स्‍टीलला मोठी मागणी वाढली. त्‍यास आजपर्यंत भरघोस प्रतिसाद मिळत आहे. गुणवतापूर्ण स्‍टीलमुळेच कच्‍छ (गुजरात) येथील सर्व बांधकामे व नर्मदा कॅनॉलचा सर्वाधिक भाग हा मेटारोल स्टीलने उभारण्यात आलेला आहे. दरम्‍यानच्‍या काळात आम्‍ही वापरत असलेले तंत्रज्ञान महाराष्ट्रातील इतर कंपन्‍यांना देण्यात येऊ नये यासाठी कंपनीने वर्षाला ठराविक रक्कम कंपनीस रॉयल्‍टी वाढवून द्यावी, अशी अट घातली; परंतु वापरत असलेले तंत्रज्ञान केवळ मेटारोल कंपनीपुरतेच न ठेवता इतर स्‍टील कंपन्‍यांनाही मिळावे, यासाठी कंपनीने पुढाकार घेतला. त्‍यामुळे आता देशात गुणवत्तापूर्ण टीएमटी स्टीलची निर्मिती करणाऱ्या कंपन्‍यांमध्ये वाढ झाली आहे. याचा आजही आत्मिक आनंद असल्याने कंपनीचे संचालक मंडळ नमूद करते.

कोणताही उद्योग सुरू करताना भांडवल असणे गरजेचे आहे. त्यावेळी सर्वांची आर्थिक परिस्थिती जेमतेमच होती. त्यामुळे अनेकांनी एकत्र येऊन काम करण्याचे ठरविले. ही मिल बॅंकेकडून घेताना काही ठराविक रक्कम भरण्यासाठीही मोठ्या आर्थिक संकटांना तोंड द्यावे लागले होते. परंतु, सर्वजण एकत्र असल्‍याने ती वेळ कशीबशी निघून गेली. पुढील काळात बँकेने करत असलेले काम, गुणवता लक्षात घेऊन पुन्‍हा कर्जपुरवठा केला. दरम्‍यानच्‍या काळात स्‍टील उद्योगामध्ये तेजी-मंदीचा काळ होता. वर्ष १९९६ ते २०२१ म्‍हणजे आजपर्यंतच्‍या २५ वर्षांच्‍या कालखंडात चार ते पाच वेळा मंदीच्‍या झळा सोसाव्‍या लागल्‍या आहेत. त्‍यामुळे मोठ्या संघर्षातूनही हा उद्योग आज नावारूपाला आला आहे व सुस्‍थितीत आजही प्रगतिपथावर आहे.

वर्ष १९९६ मध्ये सुरू केलेली स्टील उद्योग आज प्रत्येकाच्या मनामनात आहे. बांधकाम क्षेत्रात आज ग्राहक बाजारामध्ये प्रामुख्याने मेटारोलच्‍या स्‍टीलची मागणी करतात. त्‍यामुळे ग्राहकांच्‍या मनात आम्‍ही विश्‍वास निर्माण करण्यात यशस्‍वी झालो आहोत याची ही पोहच पावतीच आहे.

स्टील उद्योग सुरू करताना केवळ पैसा कमवावा ही एकमेव उद्देश नव्हता. त्यामुळे कंपनीमध्ये काम करणारे सर्व अधिकारी व कर्मचारी हे एक कुटुंब बनले आहेत. दुसऱ्या पिढीला स्टील उद्योग देताना केवळ पैशाच्या मागे न लागता गुणवत्ता कायम ठेवणे तसेच नवनवीन तंत्रज्ञान आत्‍मसात करून त्‍याची निर्मिती करण्याचा मूलमंत्र दिला जाणार आहे. ग्राहकांचे हित डोळ्यांसमोर ठेवून जोपर्यंत व्‍यवसाय केला जात नाही, तोपर्यंत त्‍यामध्येयशस्‍वी होता येत नाही.

स्टील उद्योगामध्ये दोन पद्धतीचे काम असतात. एक म्हणजे हॉट वर्क व कोल्ड वर्क. पूर्वी स्टील कंपनीमध्ये उत्तर प्रदेश, बिहार अशा इतर राज्यातील मजूर काम करत होते. परंतु, शासनाच्या निर्देशानुसार ८० टक्के रोजगार हा स्थानिक लोकांना देण्याचा निर्णय पाळला जात आहे. तसेच स्टील उचलण्यासाठी मनुष्यबळाचा वापर न करता मशिनरीच्‍या साहाय्याने हे काम केले जात आहे. तसेच अभियांत्रिकी विद्यार्थ्यांसाठी स्टील रोलिंग मिल हा अभ्यासक्रमही शासनाला तयार करून देण्याबाबतही सहकार्य केले आहे. राज्यातील स्टील उद्योगासाठी कुशल मनुष्यबळ येथे निर्माण झाले पाहिजे, त्या दिशेने मेटारोलची वाटचाल सुरू आहे.

स्टीलसोबत इतर उद्योगातही काही तरी नवीन करावे अशा विचाराने वर्ष २००७ मध्ये मराठवाड्यात पहिल्‍यांदाच लक्ष्मी कॉटस्पीन लिमिटेड नावाने मिल सुरू करण्यात आली. कपडानिर्मितीसाठी लागणाऱ्या कच्चामालावर या ठिकाणी प्रक्रिया करण्यात येते. सुमारे ३० हजार क्विंटलची निर्मिती करणारी मिल असून, मराठवाड्यातील ही पहिली खासगी मिल आहे. मराठवाड्यात मोठ्या प्रमाणात उत्पादित होणाऱ्या कापसावर आधारित काही उद्योग असावा, या हेतूने लक्ष्मी कॉटस्‍पीनची निर्मिती करण्यात आलेली आहे. या उद्योगाचीही घोडदौड सुरू आहे.

मेटारोल कंपनीच्या माध्यमातून वर्ष २००४ मध्ये ऋषी विद्या फाउंडेशन ही शाळा सुरू केली. या शाळेच्या माध्यमातून सामान्य नागरिकांच्या मुलांना गुणवत्तापूर्ण शिक्षण मिळावे यासाठी या शाळेची निर्मिती करण्यात आली आहे. गतवर्षी या संस्‍थेची पहिली दहावीची बॅच निघाली आहे. आजमितीला या शाळेच्‍या तीन सुसज्ज इमारती उभारण्यात आल्‍या असून, यातून गुणवत्तापूर्ण ज्ञानदानाचे काम अविरत सुरू आहे.

जालना जिल्‍हा हा अवर्षणप्रवण क्षेत्रात काही प्रमाणात मोडतो. त्‍यातल्‍या त्‍यात शहरातील पिण्याच्‍या पाण्याची अत्‍यंत गंभीर समस्‍या काही वर्षांपूर्वी होती. संपूर्ण स्‍टील उद्योगासह इतर उद्योगांना पाणी विकत घ्यावे लागत होते. पाण्याच्‍या बाबतीत आपण स्‍वयंपूर्ण असावे, या हेतूने कंपनीच्‍या परिसरात जागा विकत घेऊन या ठिकाणी १२ कोटी लिटर क्षमतेचे प्रशस्‍त शेततळ्याची निर्मिती केली आहे. त्‍याचबरोबर पाण्यासाठी काम करणाऱ्या शहरातील अनेक सामाजिक संस्‍थांसह नदी-नाले खोलीकरणासह इतरही कामे केली असून, अनेक कामांना आर्थिक साहाय्यही केले आहे.